إزاي بتحسب الضريبة في قانون التيسيرات 2025؟
أنا محمد علي فراج – المحاسب القانوني،
في النظام العادي، الضريبة بتتحسب على صافي الربح بعد خصم التكاليف والمصروفات. لكن في قانون التيسيرات، الوضع أبسط من كده بكتير.
القانون قال:
الضريبة هتتحسب كنسبة من حجم أعمالك السنوي (يعني إجمالي المبيعات أو الإيرادات)، بغض النظر عن مصاريفك.
يعني مش مطلوب منك تحسب أرباحك ولا تمسك دفاتر معقدة زي الشركات الكبيرة. كل اللي عليك تبص على رقم مبيعاتك السنوي، وتشوف هتدخل في أي شريحة.
تعال نشوف الشرائح بالتفصيل:
لحد 500 ألف جنيه مبيعات في السنة: • الضريبة = 0.4% من حجم الأعمال
أكتر من 500 ألف ولحد أقل من 2 مليون جنيه: • الضريبة = 0.5% من حجم الأعمال
من 2 مليون لحد أقل من 3 مليون جنيه: • الضريبة = 0.75% من حجم الأعمال
من 3 مليون لحد أقل من 10 مليون جنيه: • الضريبة = 1% من حجم الأعمال
من 10 مليون لحد أقل من 20 مليون جنيه: • الضريبة = 1.5% من حجم الأعمال
لو حجم أعمالك في السنة عدى 20 مليون جنيه، هتخرج من نظام التيسيرات وتدخل على النظام العادي، إلا لو الزيادة دي كانت بسيطة (ما تزيدش عن 20% ولمرة واحدة بس خلال أول 5 سنين).
الميزة الكبيرة في النظام ده: • بسيط جدًا ومش محتاج محاسب أو دفاتر معقدة.
• النسب قليلة مقارنة بالنظام العادي.
• مفيش تقديرات جزافية من الضرائب.
• بتشتغل وانت مطمّن إن كل حاجة قانونية وواضحة.
مثال عملي بسيط:
لو عندك محل بيبيع أدوات منزلية وحققت مبيعات في السنة بـ 400,000 جنيه:
هتدفع ضريبة = 0.4% × 400,000 = 1,600 جنيه بس!
وده مبلغ بسيط جدًا مقارنة بالنظام العادي.
تابعوني في الحلقة الجاية، وهشرح لكم إزاي تسجل نفسك في قانون التيسيرات، وخطوات تقديم الطلب علشان تستفيد من النظام الجديد.
ولو عندك أي سؤال أو عايز تعرف مشروعك في أي شريحة، ابعتلي علي رقم 01068190241 وأنا هرد عليك بنفسي.
